--> : true });

تعرف على كيفية تأسيس المشاريع الصغيرة والمتوسطة

تعرف على كيفية تأسيس المشاريع الصغيرة والمتوسطة



    بقلم : احمد ذكى
    لو بتفكر تفتح مشروع صغير حتي 50 الف او متوسط حتي 200 الف ج
    يبقي المقال ده ليك

    هبدء الأول بالمشاريع الصغيرة

    تعريف المشروع الصغير ؛ هو المشروع الذي يحتاج عدد عمالة قليل وبالاضافة الي راس مال قليل
    أي مشروع لا يتعدي 50 الف جنية يعتبر مشروع صغير الحجم
    مشاريع زي أية ؟
    - قهوة بلدي
    -محل بلاي استيشن
    -محل ادوات كهربائية
    -صالون حلاقة
    -سوبر ماركت
    - محل خضار وفاكهه
    - مشاريع أكل او محل كبده وسجق وما شابه
    - محل كوي وغسيل
    - مغسلة العربيات اليدوية او البسيطة
    -محل كوتشيات وجزم شعبي
    - مكتبة تصوير وطباعة وكتب ابتدائي
    - محل عصائر وايس كريم
    -Co work space

    وغيرهم ما شابهم في المواصفات فالمشاريع الكتيرة
    أه في ناس بتكسب من المشاريع دي ملايين بالمناسبة ولكن هو سوق وقرفة ونصيب
    فقلة راس المال لا تعني قلة الدخل او العائد بالعكس دواره راس المال فيها سريعة

    وهدي مثال بسيط بالسوبر ماركت
    في سوبر ماركت بيحط حته الجبنة علي كيس وبعديها يغلفها وفي سوبر ماركت بيستخسر ثمن حته الكيس دي وبيلفها في ورقه علي طول

    الاول هينجح والعميل هيزوره دايما ودوراه راس ماله هتبقي سريعة
    الثاني كسب مرة وقلل التكلفة مرة وخسر بقيه الأيام لان العميل حتي لو كان شعبي بيحب يتقدمله احسن الخدمات بأقل الاسعار وبالمناسبة ده حقه

    المشاريع دي كلها تقدر تقف علي رجليها ب 50 الف جنية

    أهم شئ في المشاريع هي أختيار المكان

    كل ما الرجل زيادة في الشارع كل ما فرصه بيعك واقتناصك لعملاء جديد او زباين جديدة
    كانت فرصتك اكبر

    ومش معني أن في محل ملابس عليه رجل كتيره في شارع معين ، أفتح انا كمان في نفس الشارع

    العدد اللي بيعدي واحد فلما كان بيتقسم علي واحد بقي بيتقسم علي اتنين ويا سلام لو بقوا 10 محلات في شارع واحد

    وكثر المحلات في شارع واحد هو خطأ تجاريا وليس صحيحاً
    الكثرة بتخليك اصحاب المحلات تعاني من قلة الزباين فبالتالي دائما يلجأ الي العروض والتخفيضات والخصومات وده جزء من الترويج اللي جزء من التسويق بيتم استخدامه اثناء ركود منتج معين أو عدم قدرة فريق البيع علي البيع بشكل كبير

    فبيتم اللجوء الي الخصومات والعروض ، فتخيل طول السنة المحل عامل عروض وتخفيضات  ؟
    ده معناه انه مش بيبيع علي فكرة

    فأختيار المكان هو سر السعادة وفتح الخير عليك
    اعرف كافية اختار أهدي حته في منطقة ما وراح فتح بديكور عالي وبقي بتاع Vips Clients وده بقي ترجته

    الفكرة هل الشارع او المكان ده محتاجك فيه ولا لا

    -  رقم 2 يعتمد علي القدرة العمالية

    لو محل شغال فيه شخص واحد فبيتم أهلاك الشخص ده جسديا بشكل كبير  وشغل المشاريع الصغيرة متعب
    لو انت صاحب المشروع بتفتح يوميا من 10 الي 10
    فانت خلال 6 شهور هتهلك جسدياً وكمام مبتاخدش اجازات فتهلك روحياً
    فلو الزبون أشتري زي الفل ولو  هو قعد يناهد ويفاصل اقعد هتتعصب عليه غصب عنك وهتضايق وده بداية السقوط والفشل

    عشان كده مهم جداً متكونش لوحدك في المكان ، هات حد يساعدك ويبيع معاك
    علي الاقل ما تقوم به من خدمات زي رص الأرفف والتنظيف والوقوف مع العميل والبيع يكون متقسم علي اثنين مش واحد
    واما الشغل يزيد معاك هات حد كمان

    الأرزقيه (لفظ بالعامية يعني اللي بيسترزق ) بالذات بيجوا برزقهم فمتقلقش ربك بيرزق الطير عشان متوكل عليه فمش هيرزقك انت يعني

    في عرف سائد في الاسواق الشعبية ؛ رش المياة علي الارض بالملح
    والتنظيف صباحياً ومسائياً والاكل في المحل
    دي كلها اشياء  عليك الاعتياد عليها مع التحفظ علي رش المياة بالملح فهذا من الاعتقاد  السئ

    لكن لو حالك وقف او مفيش زبون دخل لك

    هنا يجي المعتقد الديني وهو السعي والسعي هنا هو الترويق والتنظيف ورص المنتجات من تاني وغسيل الكوبايات والارفف
    ساعتها هتلاقي العميل بيجي ، عارف ليه عشان ربنا عظيم وكريم في معاملاته مع عبيده

    اللي بيكلمك بياع ملابس قديم ولحد دلوقت بقف كل رمضان في أول محل اشتغلت فيه في الملابس ويكا جينز  تقديراً وتكبيراً لدور صاحب المحل محمد حسين ويكا اللي أحترمني وعلمني واسس فيا حاجات في الادارة استعملتها لما بقيت مدير مبيعات Weka Jeans

    رقم 3 وهي التميز

    في محلين بيعملوا سندوتشات كبدة بنفس الاسعار
    طيب لية ده بينجح وده مبينجحش

    عشان الخدمة اللي بيقدمها ؛ طبق السلطة او المخلل اللي بيتقدم ده اسمه خدمة

    نظافة المحل خدمة ، نظافة العمال خدمة ، الأبتسامة خدمة
    ايوة ممكن بأبتسامة الشخص اللي شغال في مشروع صغير يكون سبب ف أن صاحب المحل يكسب ملايين

    فالأبتسامة لا يمكن أن يفعلها حاقد او حاسد او مضايق او زعلان او مضايق

    تميز بالشئ اللي بتقدمه حتي لو بتعمل قهوة هات بن نضيف

    وامشي بالمثل الصيني العظيم  اللي مخصص للصناعات الصغيرة الصينية في وقتها

    " بيع كتير بثمن قليل تكسب كتير "

    4- خلي دايما عندك مبدء وهو رضا العميل
    واعرف دائما ان قوة اي شركة في عملائها وأن الشركة من غير عملاء هتقفل

    وفي فترات الشتاء حصل موقف بايخ من أحدي الماركات المشهورة في مصر وهو رفض أن الاطفال تستخدم حمامات الفرع

    اية اللي حصل
    حملة كبيرة لمقاطعة منتجات الشركة دفعتهم الي الاحتياط والتنبية علي كل الفروع بعدم تكرار المنع بل والاعتذار وكمان خصومات في بعض الفروع

    يعني لو جالك عميل لازم تهتم بمشكلته وبحلها ومتكونش جزء من المشكلة بل كن جزء من الحل

    نيجي بقا للتكلفة

    هناخد مثال قهوة بلدي في منطقة شعبية او مجاورة لمنطقة راقية

    إيجار المشاريع المتوسطة يترواح بين 3000 ج الي 10000ج
    والافضل لك خليك في المتوسط بين 5000 ج الي 7000 ج
    كراسي نضيفة شوية تتمثل في 70 الي 100 كرسي ب 10000 ج
    تجهيز بوفية وادوات ومعدات 10000 ج

    وكل ما تعدد المشروبات وتخزين كميات في التلاجة ده شى كويس وليكن خزين ليك 10000 ج
    انت كده 37000 ج
    وتقدى تاني يوم تجيب عامل او اتنين بمقدار 6000 ج للفردين
    كده 45000 ج
    طبعا الارقام تقريبية ف محاولة لسرد تفاصيل التكاليف بشكل بسيط وطبعا بتختلف من مكان لمكان

    ولو هتعمل صالون حلاقة فانت محتاج تجهز المكان بشكل اكبر شوية مرايات وكمان تجهيز معدات وماكينات تقريا هتوازي نفس الرقم

    وقيس علي كده كل مشروع

    طبعا مهم لاي مشروع انك تحدد المُورد اللي تقدر تجيب منه خامات والادوات اللي بتستهلكها باستمرار وتعمل معاه ديل ربع سنوي او  نصف سنوي
    بتوريد كميات

    بالنسبة للمشاريع متوسطة الحجم

    - مشروع سيارة نص نقل بصندوق او تلاجة
    -مشروع سوزوكي فان
    -مشروع كافتيرا ف مستوي أعلي
    -مطعم متعدد الاصناف
    - محل زيوت وقطع غيار
    -محل ملابس متكامل
    -محل جزم كلاسيك جلد طبيعي
    - مصنع تصنيع تيشرت وقميص
    - سوبر ماركت علي مستوي اعلي
    - وغيرها من المشاريع ما شابهم في المواصفات

    وندي مثل بالسيارة نص النقل
    تقدر من خلال المشاريع متوسطة الحجم أن تحقق دخل يومي وهنا نقف شوية قدام المصطلح الاقتصادي المصري الكبير "" بتصرف علي نفسها وعلي قسطها "
    وهنا نستنتج أن هناك جزء مقدم من المال والاخر قسط فيسمي هذا مخاطرة ومجازفة

    ثانيا ً انه تم تشغيلها في أحدي الاماكن او الشركات او نقل افراد في المناطق الشعبية
    او تاجيرها لأحد شركات المواد الغذائية أو احدي الشركات الاستثمار وقطاع الاعمال زي البترول وغيره

    ثم ان هناك فائض من الدخل بعد دفع القسط فانها  تصرف علي نفسها في غيار الزيت ومصاريف السيارة من تشحيم وغيره

    وفي الاخر هتمتلك عربية نص نقل دفعت 150 الف مثلا وقسطت 100 مكنوش موجودين معاك

    بس مش هتعمل كده الا لما تضمن طريق او سكة تقدر بيها تشغل العربية  في شركة او في مكان ما او تشغليها في خطوط سير

    وغيرها من المشاريع اللي بتقدر تعتمد عليها وليكن مشروع كافتيرا علي مستوي اعلي
    ودي بتكون للعائلات والافراد ودي ليها سوق في المجتمع المصري

    واعرف كافية في مدينة نصر عامل جزء مخصص للسيدات المنتقبات والعائلات كمان وعايز اقولك انه نار عليه ماشاء الله علية

    أستهداف الشريحة اللي فعلا محتاجين مكان يناسبهم

    كل ده تفكير بسيط ان المشاريع الصغير او المتوسطة مش محتاجه إلا 3 حاجات ملهمش رابع

    1 اعقل وتوكل
    يعني أدرس المشروع والمكان والتكلفة والموردين والعمالة والمنافسين ثم توكل علي الحي الذي لا يموت

    2- تقعد 6 شهور  علي الاقل تاخد مرتب زيك زي غيرك وده بيعمل استقرار لرأس المال وحتي لو دواره راس المال بطيئه بس علي الاقل راس المال ثابت لا ينقص نتيجة اخذك من المال لانه مالك

    3- التخطيط والتوسع
    الناس بتحب البراندات والاماكن الكتيرة لنفس البراند والسبب في كده  هو السلوك الشرائي للانسان بيعتمد علي العين
    في مثل شعبي بيقولك العين نص البيع
    انه يشوفك كتير ويشوف اسمك في كذا حته حتي لو علي الحيطة في الشارع ده بيخله دايما فاكرك ويوم ما يحتاس هتيجي اول واحد في باله عشان كده في مطاعم اكل مرتبطة بالخروجات اللي هي ترفية فتخيل الشعب المصري خلي ماكدونلز خروجة وغيرها من الاماكن

    فدايماً بعد 6 شهور الي سنة لو قدرت تغطي تكاليفك وتحقق بعض الارباح البسيطة ابدء بالتوسع
    وافتح فرع تاني وتالت ورابع
    والصعوبة كلها في الفرع الاول لو وقف علي رجله الباقي اللي بعد كده سهل


    المحور نيوز
    @مرسلة بواسطة
    كاتب ومحرر اخبار اعمل في موقع المحور نيوز .

    إرسال تعليق